ბანანის ნამცხვარი ცხობის გარეშე
დრო 60წთ
ულუფა 8
სირთულე საშუალო
შეინახე რეცეპტი

რჩევა:
თუ მაღალცხიმიანი ნაღები არ გვაქვს, მისი ჩანაცვლება ნაღების ფხვნილისგან მომზადებული კრემით შეგვიძლია. ამისთვის 1 ჭიქა ნაღების ფხვნილს უნდა დავასხათ იმავე რაოდენობის რძე ან წყალი და მიქსერით ვთქვიფოთ რამდენიმე წუთის განმავლობაში, სანამ მასა გამყარდება.

ინგრედიენტები

  • ფხვიერი ნამცხვარი ("პეჩენია") - 250 გ
  • მარგარინი - 120 გ
  • ბანანი - 2 ცალი
  • მოხარშული შესქელებული რძე - 1 ქილა
  • ნაღები 35 % - 250 მლ
  • შავი შოკოლადი - 1 ფილა
  • ნიგოზი - 50 გ

მომზადების წესები

ფხვიერი ნამცხვარი დავტეხოთ და წვრილად დავფშვნათ, რომ ფქვილად იქცეს – ამისთვის შეგვიძლია ბლენდერიც გამოვიყენოთ. მარგარინი გავადნოთ. დაფშვნილ ნამცხვარს დავასხათ გამდნარი მარგარინი და კარგად მოვურიოთ. ეს მასა გადავიტანოთ საცხობ ფორმაში (უმჯობესია გამოვიყენოთ ისეთი ფორმა, რომელსაც გვერდები ეხსნება) და ხელით თანაბრად გავაბრტყელოთ, თან გვერდებიც ამოვუყვანოთ. საცხობი ფორმა 15-20 წუთით შევდგათ საყინულეში, რომ მასა გამკვრივდეს და შესქელებული რძის ფენის წასმა გაგვიადვილდეს. ბანანი დავჭრათ თანაბარი სისქის მრგვალ ნაჭრებად. ცალკე თასში მიქსერით ავთქვიფოთ ნაღები. საცხობი ფორმა გამოვიღოთ მაცივრიდან, ნამცხვრის ფენას გადავუსვათ მოხარშული შესქელებული რძე, შემდეგ მოვაწყოთ დაჭრილი ბანანი, ზემოდან დავასხათ ათქვეფილი ნაღები და რამდენიმე საათით ან მთელი ღამით შევდგათ მაცივარში, ოღონდ არა საყინულეში. ორთქლის აბაზანაზე გავადნოთ შავი შოკოლადი. ამისთვის ღრმა თასში ან ქვაბში უნდა ჩავასხათ წყალი, ზემოდან კი დავადგათ მეორე, მომცრო ზომის თასი ისე, რომ მისი ძირი წყალს არ ეხებოდეს. შოკოლადისთვის განკუთვნილი თასი უნდა იყოს მშრალი და მასში წყლის ერთი წვეთიც არ უნდა მოხვდეს. გამდნარი შოკოლადი მოვასხათ უკვე გაცივებულ ნამცხვარს, ზემოდან მსხვილად დაფქული ნიგოზი მოვაყაროთ.

ჟურნალი "გემრიელია"

ტეგები:
ნამცხვარი ბანანი ნანახია: 1707