საფირმო ხაჭაპური ოთხი სახეობის ყველით რესტორან „ალაგის“ შეფმზარეულისგან
საფირმო ხაჭაპური ოთხი სახეობის ყველით რესტორან „ალაგის“ შეფმზარეულისგან

 

ხაჭაპურის ბევრნაირი რეცეპტი არსებობს. ყველა მათგანი განსაკუთრებული და უნიკალურია, მაგრამ თუ გსმენიათ სეზონური ხაჭაპურის შესახებ? რესტორან „ალაგის“ შეფმზარეული, ილია კანკაძე, თავის სტუმრებს საზაფხულო ხაჭაპურით უმასპინძლდება, რომელშიც ზაფხულის არომატები ჰარმონიულად ერწყმის ერთმანეთს და დაუვიწყარ გემოს ქმნის.ეს მისი საფირმო ხაჭაპური „ალაგია“.

 

საფირმო ხაჭაპურის მთავარი ღირსება ოთხი სახეობის ყველია: სულგუნი, იმერული ყველი, პარმეზანი და მოცარელა. ზაფხულის არომატს კი რუკოლა და პომიდორი ჩერი იძლევა, რომელსაც ორი სახეობის სოუსი ემატება. რაც მთავარია, ყველა პროდუქტი, რომელსაც შეფი იყენებს, ადგილობრივი და ნატურალურია.

რესტორან „ალაგის“ შეფმზარეული ჩვენს მკითხველს თავისი საფირმო ხაჭაპურის რეცეპტს უზიარებს, რომლის მოსამზადებლადაც დაგჭირდებათ: უმაღლესი ხარისხის ფქვილი, წყალი, მცენარეული ცხიმი, სულგუნი, იმერული ყველი, მოცარელა, რუკოლა თავისი სოუსით, პესტოს სოუსი და პომიდორი ჩერი.

 

პირველი ნაბიჯი ცომის მომზადებაა. შეფმზარეულის თქმით, „ალაგში“ ყველანაირი ცოლმეულის ცომი სამარცხვოა, ამიტომ ხაჭაპურის ცომსაც წყალსა და მცენარეულ ცხიმზე ზელს.

 

 

მცირე ხნით დასვენებულ ცომს ვაბრტყელებთ დაშიგთავს ვურთავთ. შეფი შიგთავსისთვის ორი სახეობის ყველს იყენებს: სულგუნსა და იმერულ ყველს. ყურადღება უნდა მივაქციოთ პროპორციებსაც. შეფის თქმით, იდეალური ბალანსისთვის სასურველია 70% იმერული ყველი და 30% სულგუნი გამოვიყენოთ.

 

გულსართის მოთავსების შემდეგ ცომს ფორმა უნდა მივცეთ, ხელით ოდნავ გავწიოთ და რამდენიმე ადგილას ჩანგლით დავჩხვლიტოთ, რათა ცომი არ ამოიბეროს. ამის შემდეგ სასურველ ზომაზე გავაბრტყელოთ და „მოსართავად“ გავამზადოთ.

 

სანამ ხაჭაპურის ზედაპირს ყველითა და პომიდვრით გააფორმებს, შეფი ბიზონს, ანუ კვერცხის,არაჟნისა და მცენარეული ცხიმის მასას უსვამს ხაჭაპურს. ბიზონის დანიშნულება ცომის დარბილებაა, რადგან „ალაგის“ საფირმო ხაჭაპური რბილი და არამსხვრევადი უნდა იყოს.

 

ბიზონის გადასმის შემდეგ ხაჭაპურს ზედაპირზე ყველის პირველი ფენა, გახეხილი სულგუნი ემატება.

 

ბოლოს საშუალი ზომის პომიდორი დავჭრათ და ხაჭაპურს ირგვლივ მოვუწყოთ, მათზე კი მოცარელას ორად გაჭრილი ბურთულები დავალაგოთ, ისევე, როგორც სურათზეა ნაჩვენები.

 

ხაჭაპურს ვაცხობთ 280–300 გრადუსზე, 7–8 წუთის განმავლობაში.

სანამ ხაჭაპური ცხვება, რუკოლას სოუსი მოვასხათ და კარგად ამოვურიოთ.

 

გამომცხვარი ხაჭაპურის ცენტრში რუკოლას მოვათავსებთ, ჩერი პომიდორს გარშემო მოვაწყობთ და თავზე კოვზის მესამედ პესტოს სოუსს მოვასხამთ, რათა პომიდვრის გემო კარგად გაიხსნას.

ბოლო შტრიხი პარმეზანის დამატებაა. ეს უკვე მეოთხე სახეობის ყველია.

შეფის თქმით, ოთხი სახეობის ყველის გამოყენებას თავისი მიზეზი აქვს. პარმეზანი მაგარია და მძაფრი არომატით გამოირჩევა, იმერული ყველი შედარებით მსუბუქი და ნაკლებად მარილიანია, სულგუნს თავისი ცხიმიანობა და არომატი აქვს, მოცარელა კი ამათგან ყველაზე რბილი და ნაკლებად მარილიანია. ამ ოთხი ყველის არომატი ჰარმონიულად გადადის ერთმანეთში და საბოლოოდ, სრულყოფილ გემოს იძლევა.

 

და, აი, რესტორან „ალაგის“ საფირმო ხაჭაპური „ალაგი“ მზადაა, რომლის დაგემოვნებაც გიორგი ახვლედიანის 23–ში შეგიძლიათ. აქ თქვენ ტრადიციული და თანამედროვე გარემო, უგემრიელესი ქართული და ევროპული კერძები, ღვინის მრავალფეროვანი არჩევანი, ქალაქური მუსიკა და ყურადღებიანი პერსონალი დაგხვდებათ.

მასალის გამოყენების პირობები
15 ივლისი, 2019 04:22 p.m.
ნანახია: 445