„გამოცხობის მერე თავდაყირა უნდა ჩამოვკიდოთ...“ - ერთად მოვამზადოთ იტალიური პასკა „პანეტონე“
„გემრიელიას“ ფეისბუქჯგუფის წევრი მარინე აზბარიანი, რომელიც ხშირად გვანებივრებს თავისი რეცეპტებით, ამჯერად იტალიური პასკის, „პანეტონეს“ რეცეპტს გვიზიარებს, რომელსაც თქვენც გთავაზობთ.
რთული, შრომატევადი პროცესია... მე ახლა კარგ ფქვილის ძაბნაში ვარ... პანეტონეს უნდა ძლიერი, ცილებით მდიდარი ფქვილი. ჯერ კმაყოფილი არ ვარ ჩემი პანეტონეთი... ცხვება ძალიან ფაფუკი, ჰაეროვანი და გემრიელია, მაგრამ სტრუქტურა არ აქვს სტანდარტის შესაბამისი...
მე გამოვაცხე ბუნებრივი საფუარით - ლევიტო მადრეთი. პირველი დღე 4 საათში ერთხელ უნდა „გამოვკვებოთ" საფუარი, დაველოდოთ, რომ ორმაგად გაიზრდოს. ასე ვიმეორებთ 3-ჯერ, რის შემდეგაც ვიწყებთ პირველი ცომის მოზელვას. ინგრედიენტები უნდა იყოს ცივი, კარაქის გარდა.
პირველი ცომი (ოპარა):
80 გრ ლევიტო მადრე (დედა საფუარი)
100გრ ცივი წყალი
65გრ შაქარი
240გრ ფქვილი
2 კვერცხის გული
65გრ კარაქი
მიქსერის ჯამში მოვათავსოთ ლევიტო მადრე, წყალი, შაქარი და ფქვილი. ცომის თავით დაბალ სიჩქარეზე მოვზილოთ. როცა მასა კარგად შეივრება, თითო-თითოდ დავუმატოთ კვერცხის გულები. დაველოდოთ, სანამ მასა ერთგვაროვანი გახდება. მერე ეტაპობრივად დავუმატოთ კარაქი. კარაქიც რომ კარგად შევა მასაში, გადმოვიტანოთ მასა ცხიმწასმულ მაგიდაზე და ხელით დავამუშაოთ (კონკრეტული ტექნიკა არსებობს), სანამ მასა ელასტიური გახდება, შეივსება ჰაერით და გლიუტენი კარგად გაიხსნება. პირველი ცომი მოვათავსოთ ჯამში, დავაფაროთ ცელოფანი და თბილ ადგილას, 26-28°-ზე დავდოთ 12-16 საათით, სანამ კარგად ამოფუვდება.
მეორე, ძირითადი ცომი:
პირველი ცომი(ოპარა) მთლიანად.
70გრ ფქვილი
60გრ შაქარი
50გრ ️ემულსია(20გრ თაფლი,1ფორთოხლის ცედრა,ვანილინი.წინა დღით ვამზადებთ ემულსია.)
3 კვერცხის გული
4გრ მარილი
100გრ კარაქი
120გრ ქიშმიში
50გრ ცუკატები
თუ ბუნებრივი საფუარი სუსტია, 1 გრ მშრალ საფუარს ვუმატებთ ცომში.
როგორც პირველი ცომის შემთხვევაში, ინგრედინტები დავუმატოთ გარკვეული წყობით: ჯერ ცომი, შემდეგ - შაქარი, ემულსია, ფქვილი, შემდეგ კვერცხის გულები, მარილი, კარაქი და სულ ბოლოს - ქიშმიში და ცუკატები, წინასწარ დამუშავებული.
მიქსერის შემდეგ ცომი მოვათავსოთ მაგიდაზე, დავამუშაოთ, შემდეგ დავტოვოთ 10-15 წუთით, ასე დაისვენოს. მერე გავანაწილოთ ქაღალდის ფორმებში. ამ დოზით გამოდის 1-1,100 გრ ცომი, ანუ 3 პატარა ან 2 ცალი 500 გრ-იანი პანეტონე.
პასკას ქაღალდის ფორმაში თბილ ადგილას ვტოვებთ 4-6 საათით, კარგად უნდა ამოფუვდეს. ვაცხობთ 160-170°-ზე 30-40 წუთით. გააჩნია ფორმის ზომას, ღუმელს. გამოცხობის მერე თავდაყირა უნდა ჩამოვკიდოთ პანეტონები ქვაბებში ან მოვაწყოთ სპეციალურად სივრცე. ჩამოკიდებული უნდა დარჩეს მინიმუმ 3-4 საათით ან მთელი ღამით, რათა დაზეპილი არ იყოს და არ დაკარგოს ჰაეროვანი, მსუბუქი სტრუქტურა.
თქვენ რომელი პასკის გამოცხობას აპირებთ წელს?