თევზი შეწვისას არ დაიშლება თუ... 10 კულინარიული ხრიკი, რომელიც სამზარეულოში ფუსფუსს საგრძნობლად გაგიმარტივებთ
გემრიელად ჭამა ყველას უყვარს, მაგრამ ცოტამ იცის, თუ რამხელა შრომის ფასად უჯდება დიასახლისს ოჯახის წევრების გულის მოგება კიდევ ერთი კულინარიული შედევრის მომზადებით. ჩვენ გასწავლით 10 კულინარიულ ხრიკს, რომლებიც გაგიმარტივებთ სამზარეულოში ფუსფუსს.
1. თევზის ნაჭრები
თევზის ტაფაზე შეწვისას მისი ნაწილებად დაშლის თავიდან ასაცილებლად, საჭიროა თევზის ნაჭრები გაწმინდოთ ქაღალდის ხელსახოცით და მოაყაროთ მარილი. 10-15 წუთის შემდეგ კი შეგიძლიათ შეწვათ ან გამოაცხოთ ღუმელში სურვილისამებრ.
2. თევზის ფხა
ალბათ თითქმის ყველა დიასახლისის პრობლემაა თევზის ფხისგან განცალკევება. ამ პროცესის გამარტივება კი მარტივად არის შესაძლებელი, თუ მას 1 წუთის განმავლობაში მოათავსებთ მდუღარე წყალში, შემდეგ კი ცივ წყალში. ამ „კონტრასტული შხაპის“ საშუალებით ადვილად შეძლებთ ყოველგვარი „ფხის ფეიერვერკებისგან“ თავის დაღწევას.
3. პიკანტური კარტოფილი
გემრიელი და განსხვავებული კარტოფილის მოსახარშად, საჭიროა მას ხარშვის დროს დაუმატოთ 1 სკ ძმარი, 2-3 კბილი ნიორი და დაფნის ფოთოლი (სურვილისამებრ).
4. „ხახვის ცრემლები“
არ მისცეთ ხახვს იმის უფლება, რომ აგატიროთ. ამისთვის ერთი ძალიან მარტივი გზა არსებობს. სანამ ხახვის დაჭრას შეუდგებით, დაასველეთ დანა ცივ წყალში.
5. ზედმეტი მარილი
თუ წვნიანში ზედმეტი მარილი მოგივიდათ, ნუ შეშინდებით. დაუმატეთ მას ბრინჯის მარცვლები, იგი მალევე შთანთქავს ზედმეტ მარილს და მიანიჭებს თქვენს კერძს დაბალანსებულ გემოს.
6. წვნიანის შეფერილობა
თუ გინდათ თქვენმა ბულიონმა ლამაზი და ხასხასა შეფერილობა მიიღოს, დაუმატეთ მას ცოტაოდენი ხახვის ფურცელი.
7. კვერცხის გული
იმისთვის რომ კვერცხი შუაზე გაჭრისას არ დაგეშალოთ, გაჭრამდე დაასველეთ დანა ცივი წყლით.
8. კარაქის გაშავება
იმისთვის, რომ კარაქი ცხელ ტაფაზე არ გაგიშავდეთ, საჭიროა ტაფას წინასწარ წაუსვათ მცირე რაოდენობის მცენარეული ზეთი.
9. კერძის გამოშრობა
თუ ღუმელში მომზადებისას ხორცი და ნამცხვრები ზედმეტად შრება, მაშინ ეს ხრიკი სწორედ თქვენთვისაა. შეგიძლიათ ღუმელის ქვედა ნაწილში მოათავსოთ თბოგამძლე კონტეინერი წყლით.
10. ზეთის შხეფები
დაიღალეთ ცხელ ტაფაზე ზეთის დასხმისას შხეფების ფრქვევისგან? მოაყარეთ ტაფას მარილი ზეთის დასხმამდე.
და თქვენ რომელ ხრიკს იყენებთ ხშირად? კომენტარებში გაგვიზიარეთ თქვენი ხრიკები.