როგორ მოვიწყოთ მხიარული პარასკევი საღამო სახლში, თუ გასართობად გასვლას ვერ ვახერხებთ
ყოველთვის არ არის შესაძლებელი პარასკევს საღამოს გარეთ გასვლა გასართობად, მაგრამ ეს იმას არ ნიშნავს, რომ გართობაზე უარი უნდა თქვათ. არანაკლებ საინტერესო და დაუვიწყარი შეიძლება იყოს საღამოს გატარება სახლში, თუ მის ორგანიზებას კრეატიულად და კარგი განწყობით მიუდგებით.
ჩვენ გეტყვით, როგორ გახადოთ თქვენი პარასკევი საღამო დაუვიწყარი საინტერესო იდეებითა და გემრიელი სასუსნავებით:
საღამოსთვის მზადება
პირველ რიგში შეარჩიეთ კომპანია. ვისთან ერთად გსურთ პარასკევი საღამოს გატარება სახლში? - საყვარელ ადამიანთან, მეგობრებთან თუ ოჯახის წევრებთან? მოამზადეთ მყუდრო სივრცე: მოაშორეთ არასაჭირო ნივთები, მოაწყვეთ კომფორტული სავარძლები ან ბალიშები. მყუდრო განათება და ფონური მუსიკა ხელს შეუწყობს მხიარული ატმოსფეროს შექმნას.
ლუდი საღამოს მთავარი სასმელია
ლუდის არჩევანი საღამოსთვის მნიშვნელოვანი ელემენტია. შეარჩიეთ რამდენიმე ვარიანტი სხვადასხვა გემოვნებისთვის: თეთრი ან შავი. ლუდი წინასწარ გააცივეთ და მოამზადეთ შესაბამისი ჭიქები.
ახლა, ლუდთან მისაყოლებელი ხემსის დროა...
შებოლილი თევზი ძალიან უხდება ლუდს. არჩევანი დამოკიდებულია თქვენს პრეფერენციებზე, რომელი უფრო მოგწონთ, შებოლილი სკუმბრია, ქაშაყი თუ ორაგული. მაგიდაზე თევზი ლამაზად მიიტანეთ: დაჭერით პატარა ნაჭრებად, მორთეთ მწვანილებით, დაჭრილი ლიმონით.
ასევე შეგიძლიათ მოამზადოთ კანაპეები შებოლილი ორაგულით, კრემყველითა და კრეკერით. ან საინტერესო სენდვიჩი, მაგალითად - შებოლილი ორაგულის სენდვიჩი თხის ყველით
ამ გემრიელი სენდვიჩის მოსამზადებლად დაგჭირდებათ: ჭვავის პური, შებოლილი ნორვეგიული ორაგულის თხელი ნაჭრები, კლასიკური ბერძნული იოგურტი, კიტრის თხელი ნაჭრები, თხის ყველი, ახლად დაფქული წიწაკა, დაჭრილი ნიორი ან კამა.
პურზე წაუსვით იოგურტი, მოაყარეთ დაფხვნილი თხის ყველი, ზემოდან დაადეთ ორაგულის ნაჭრები, კიტრი, მოაყარეთ წიწაკა და დაჭრილი კამა. თხის ყველი ორაგულთან ძალიან საინტერესო კომბინაციას ქმნის. კარგი ალტერნატივა იქნება ასევე მისი ჩანაცვლება „მოცარელით“.
თუმცა თუ არ გსურთ ალკოჰოლის მიღება, შეგიძლიათ ლუდი მილკშეიკებითა და ცივი სასმელებით ჩაანაცვლოთ.
ცივი სასმელები
ცივი უალკოჰოლო სასმელებიდან ზაფხულის სიცხეს განსაკუთრებით უხდება ცივი ყავა ნაყინით, ან მილკშეიკი ხილის არომატით.
ცივი ყავის მოსამზადებლად დაგჭირდებათ: ყინული, 2 ჭიქა კარგი ხარისხის ესპრესო, 2 ჩ/კ შაქარი, 2 დიდი ბურთულა ვანილის ნაყინი, 2 ჭიქა ცივი რძე (შეიძლება ნაკლები დასჭირდეს, ჭიქის ზომის მიხედვით).
ყავის მომზადებისას მოათავსეთ ორი მაღალი ჭიქა საყინულეში რამდენიმე წუთის განმავლობაში გასაციებლად. სანამ ყავა ჯერ კიდევ ცხელია, დაამატეთ შაქარი და ურიეთ, სანამ შაქარი არ გაიხსნება. შეავსეთ 2 მაღალი ჭიქა ყინულით და დაასხით 1 ფინჯანი ყავა ყინულზე თითოეულ ჭიქაში. ჩააგდეთ ვანილის ნაყინი და დაასხით ცივი რძე. მიირთვით გრძელი კოვზით და საწრუპით.
მილკშეიკი მარწყვით
მილკშეიკის მოსამზადებლად დაგჭირდებათ: ახალი მარწყვი, ვანილის ნაყინი, ½ ჭიქა რძე, 2 ს/კ. შაქარი, გემოვნებით მწიკვი მარილი. ათქვეფილი ნაღები და მარწყვი სერვირებისთვის.
დააბლენდერეთ ახალი მარწყვი, 1 ლიტრი ვანილის ნაყინი, ½ ჭიქა რძე, 2 ს/კ. შაქარი და ცოტა მარილი. აურიეთ საშუალო სიჩქარით, სანამ არ გახდება ერთგვაროვანი მასა. მილკშეიკი გაანაწილეთ ორ ჭიქაში, ზემოდან დაადეთ ათქვეფილი ნაღები და მარწყვი. დაუყოვნებლივ მიირთვით.
გართობა და თამაშები
იმისათვის, რომ საღამო არა მხოლოდ გემრიელი, არამედ სახალისო იყოს, განიხილეთ გასართობი პროგრამა.
მაგალითად:
სამაგიდო თამაშები: კლასიკური მონოპოლია, ჯენგა, ან თანამედროვე სამაგიდო თამაშები, რომლის მრავალი ვერსია არსებობს.
კინოსეანსი: აირჩიეთ რამდენიმე საყვარელი ფილმი ან სერიალი, მოამზადეთ პოპკორნი და ისიამოვნეთ ერთად ყურებით.
კარაოკე: თუ გიყვართ სიმღერა, კარაოკე შესანიშნავი გასართობია. შეგიძლიათ გამოიყენოთ სპეციალური აპები ან YouTube თქვენი საყვარელი სიმღერების მოსაძებნად.
და ბოლოს საღამოს ტკბილი დასასრული - ნაყინის ტორტი
ნაყინი მშვენიერი დესერტი იქნება, რომელიც ბავშვობის ნოსტალგიურ ელფერს შემატებს საღამოს. ჩვენ გასწავლით, როგორ მოამზადოთ დესერტი მარტივად:
დაგჭირდებათ:
- შოკოლადის ნაყინი „პალომა“
- ფისტას ნაყინი „პალომა“
- ვანილის ნაყინი „პალომა“
- ორცხობილა „ორეო“
- კენკრა ან თხილი მოსართავად (სურვილისამებრ)
მომზადება:
- აიღეთ ფორმა, რომელსაც ეხსნება გვერდები. ძირში, პირველ ფენად მოათავსეთ დამსხვრეული ორცხობილა „ორეო“.
- შემდეგი ფენა იქნება შოკოლადის ნაყინი. თხლად მოაფხვენით „ორეოს“ მეორე ფენა, ზემოდან ფისტას ნაყინი და დაასრულეთ ვანილის ნაყინით.
- შედგით საყინულეში გამაგრებამდე. შემდეგ, შემოახსენით ფორმას გვერდები და დაჭერით ტორტის ნაჭრების მსგავსად.
სცადეთ მოაწყოთ საკუთარი წვეულება სახლში და ნახავთ, რომ შინ გართობა არანაკლებ სახალისო და საინტერესო შეიძლება იყოს.