სამფეროვანი შოკოლადის კრემის რეცეპტი "შოკოლადის ოქროს წიგნიდან"
გამოდის 6 ულუფა. მომზადების დრო: 30 წთ + 3 სთ გასაცივებლად.
რეცეპტი გახლავთ "შოკოლადის ოქროს წიგნიდან", რომელშიც 300-ზე მეტი გასაოცარი დესერტის რეცეპტი დაგხვდებათ. საუკეთესო დესერტები, ღვეზელები, ტარტები, მაფინები, კექსები, პუდინგები, კრემები, ტორტები, ნატიფი დესერტები, ნაყინი, სასმელი, კანფეტები და სხვა ტკბილეული - ეს ყველაფერი თავმოყრილია ამ მომაჯადოებელ წიგნში, რომელიც თქვენთვის შეიქმნა. წიგნის შესავალ ნაწილში ასევე გაეცნობით შოკოლადის ისტორიას ანტიკური ხანიდან თანამედროვეობამდე.
ინგრედიენტები:
- 375 მლ ნაკლებცხიმიანი ნაღები
- 1 ვანილის ჩხირი (ორად გახლეჩილი და გამოფხეკილი)
- 90 გ. შავი შოკოლადი (მინიმუმ 60%-იანი კაკაოს შემცველობით)
- წვრილად დაჭრილი 90 გ. რძიანი შოკოლადი
- 90 გ. თეთრი შოკოლადი
- 6 დიდი კვერცხის გული
- 100 გ. შაქარი
- 1/4 ჩ/კ. მარილი
მომზადების წესი:
- ნაღები და ვანილის ჩხირი ქვაბში მოათავსეთ და საშუალო ცეცხლზე ადუღებამდე მიიყვანეთ. ქურიდან გადადგით და 10 წთ-ით გააჩერეთ.
- სამივე სახეობის შოკოლადი ცალ-ცალკე ცეცხლგამძლე ჭურჭელში ორთქლის აბაზანაზე გაადნეთ. შემდეგ სამივე ქურიდან გადადგით და გააცივეთ.
- საშუალო ზომის ქვაბის 1/3 წყლით გაავსეთ და წამოადუღეთ.
- კვერცხის გულები საშუალო ზომის ჯამში მოათავსეთ, ჯამი მდუღარე წყლიან ქვაბში ჩადგით და გულები განუწყვეტლივ თქვიფეთ, სანამ მასა სპეციალური თერმომეტრით გასინჯვისას 80 გრადუს C-ს არ უჩვენებს. აცადეთ გაგრილდეს.
- 2-2 კვერცხის გული სამივე ჯამში თანაბრად გაანაწილეთ და ერთგვაროვანი მასის მიღებამდე თქვიფეთ.
- შაქარი და მარილი პატარა ჯამში შეურიეთ და ეს ნაზავიც თანაბრად გაანაწილეთ შოკოლადიან ჯამებში. ურიეთ, სანამ შაქარი ბოლომდე გადნება.
- ნაღებიდან ვანილის ჩხირი ამოიღეთ. ნაღები ჯამებში გაანაწილეთ და კარგად ურიეთ.
- ჯამები ისევ ორთქლის აბაზანაზე დადგით და სამივე მასას იქამდე ურიეთ, სანამ კოვზს კარგად მიეკრობა.
- მოამზადეთ 6 დიდი ჭიქა. კრემები შიგ ფენებად ჩადეთ და დაახლოებით 3 სთ-ით მაცივარში მოათავსეთ, სანამ შეიკვრება.