როგორ დავამზადოთ პასკის ფორმები სახლში? - მარტივი ხერხი, რომელიც ყველას გამოადგება
აღდგომა ახლოვდება და დიასახლისებისთვის ყველაზე აქტუალური საკითხი პასკის გამოცხობაა. ხშირად ხდება ხოლმე, რომ სასურველი ზომის ფორმები მაღაზიებში აღარ გვხვდება ან უბრალოდ გვავიწყდება მათი წინასწარ შეძენა.
ფუდბლოგერმა „Gemo • გემო“-მ გაგვიზიარა საოცრად მარტივი ლაიფჰაკი, რომლის დახმარებითაც პასკის ფორმებს სახლში არსებული ნივთებით, სულ რამდენიმე წუთში დაამზადებთ.
რა დაგჭირდებათ:
- ალუმინის ფოლგა
- საცხობი ქაღალდი (პერგამენტი)
- სტეპლერი
- ნებისმიერი ცილინდრული ფორმის ქილა (რომელსაც შაბლონად გამოიყენებთ)
დამზადების ინსტრუქცია:
- აიღეთ სასურველი ზომის ქილა. ჯერ შემოახვიეთ საცხობი ქაღალდი, რათა პასკა ფორმას არ მიეკრას.
- საცხობ ქაღალდზე ზემოდან მჭიდროდ შემოახვიეთ ალუმინის ფოლგა. ეცადეთ რამდენიმე ფენა გააკეთოთ, რათა ფორმა მყარი იყოს.
- ფოლგისა და ქაღალდის კიდეები სტეპლერით დაამაგრეთ, რომ არ გაიხსნას.
- ქილის ძირზე დარჩენილი ფოლგა ფრთხილად გადაკეცეთ და ხელით დატკეპნეთ, რათა მყარი საფუძველი მიიღოთ.
- ფრთხილად ამოიღეთ ქილა და თქვენი ხელნაკეთი, ეკონომიური ფორმაც მზად არის!
ამ მეთოდით შეგიძლიათ დაამზადოთ სხვადასხვა ზომის ფორმები – პატარა „კექსისებური“ პასკებისთვის თუ დიდი, საოჯახო ნობათისთვის.
რჩევა: თუ გსურთ, რომ თქვენი პასკა კიდევ უფრო ლამაზი გამოვიდეს, გამოიყენეთ სხვადასხვა დიამეტრის ქილები მრავალფეროვანი ფორმებისთვის.