ამ რეცეპტის მიხედვით, ტორტი ცხვება ღუმელის გარეშე, გაზქურის ზემოდან, ქვაბში. გამოდის თანაბარი, ფუმფულა ბისკვიტი. საცდელად, შეგიძლიათ ჯერ ინგრედიენტების 1/4 -ით მოამზადოთ ანუ 3 კვერცხით, 1/2 ჭიქა შაქრით და ამდენივე ფქვილით, 16-18 სმ დიამტერის ქვაბში. ცხობისას აუცილებლად დაგჭირდებათ ე.წ. გამანაწილებელი, რომელიც უნდა დადოთ ქურაზე ზემოდან, შემდეგ კი ქვაბი დაადოთ. გამანაწილებელი სითბოს თანაბრად და ზომიერად ანაწილებს. თუ არ გაქვთ, შეიძლება თუჯის სქელძირიანი ტაფა გამოიყენოთ. ჯერ ტაფას დადებთ ცეცხლზე, შემდეგ მასში ჩადგამთ ქვაბს. გამანაწილებელი წინასწარ უნდა გააცხელოთ, ცეცხლი კი უნდა იყოს აუცილებლად მინიმალური. 12 კვერცხიანი რეცეპტისთვის დაგჭირდებათ 32-35 სმ დიამეტრის ალუმინის სწორგვერდებიანი ქვაბი. ძირში ჩააფინეთ ქაღალდი, ცხიმს ნუ წაუსვამთ. ქვაბის თავსახურს შემოახვიეთ პირსახოცი. მოამზადეთ ცომი: კვერცხები და შაქარი თქვიფეთ, სანამ მასა ზომაში 3-ჯერ არ მოიმატებს. თუ გსურთ, შეგიძლიათ ცალ-ცალკე ათქვიფოთ ცილა+შაქარი და გული. მიქსერის გარეშე, ნაწილ-ნაწილ შეურიეთ ფქვილი, დაამატეთ ვანილიც. ცომი გადაიტანეთ ქვაბში და მჭიდროდ დაახურეთ თავსახური. ჰაერი არ უნდა შედიოდეს. დადგით გამანაწილებელზე და გამოაცხეთ. გამოსაცხობად სჭიდება 1-1.5 საათი. არ ახადოთ თავსახური ცხობის დროს. მზაობას მიხვდებით სურნელით: ოთახში რომ ბისკვიტის გემრიელი სუნი დატრიალდება და ცხობის დროც დასასრულს უახლოვდება, შეგიძლიათ შეამოწმოთ ხის ჩხირით. ბისკვიტის გვერდებს დანის პირით შემოუარეთ და გადმოიღეთ ცხაურზე. გაციების შემდეგ გაჭერით და წაუსვით ნებისმიერი კრემი. ბისკვიტს სჭირდება დანამვაც.