გაცერით ფქვილი, დაამატეთ მარილი, წყალი და ზეთი. მოზილეთ ცომი. თავიდან ცომი წებოვანია, მაგრამ ზელვასთან ერთად რბილი, ელასტიური და პრიალა გახდება. ამის შემდეგ ცომი ცელოფანში გაახვიეთ და ოთახში დატოვეთ 1 საათი. თუ მთლიანი ცომის გამოყენებას მაშინვე არ გეგმავთ, ზედმეტი ულუფა ცელოფანში შეახვიეთ და მაცივარში შეინახეთ 7-8 დღე. გამოყენებამდე კი ოთახის ტემპერატურაზე დატოვეთ.ცომი (მთლიანი ულუფა) გაყავით 12 თანაბარ ნაწილად. მიეცით ბურთის ფორმა. დააფარეთ პირსახოცი ან ცელოფანი დანარჩენ გუნდებს, სანამ ერთს დაამუშავებთ. გადაიტანეთ ცომის გუნდა დაფქვილულ მაგიდაზე და დაიწყეთ გაბრტყელება რა ფორმითაც გსურთ. იმუშავეთ ფრთხილად, მოაყარეთ ცომს ფქვილი, რომ არ მიეწებოს, გაწელეთ ხელებით, მაგრამ ცომი არ უნდა გახიოთ. გააბრტყელეთ მაქსიმალურად თხლად, ისე რომ თითქმის გამჭვირვალე გახდეს ცომი. მზა ფენა გადაიტანეთ პირსახოცზე, დააფარეთ პერგამენტის ქაღალდი და ზემოდან კვლავ პირსახოცი.დაამუშავეთ დანარჩენი ცომის გუნდებიც და თითოეული ფენა დაადეთ მეორეს. ფენებს შუა ჩააყოლეთ პერგამენტის ქაღალდი, ზემოდან კი პირსახოცი დააფარეთ. მზა ცომი გამოიყენეთ მაშინვე სხვადასხვა სახის ღვეზელის ან ბაქლავის მოსამზადებლად.