დიდ ქვაბში ჩაასხით წყალი და აადუღეთ. დაამატეთ მარილი. ბადრიჯანი ჩაჭერით ერთი მხრიდან, მაგრამ არა ბოლომდე. გადაიტანეთ მდუღარე წყალში, დააფარეთ და ხელახლა წამოადუღეთ. ფერს რომ შეიცვლის და ცოტა მორბილდება, ამოიღეთ, დაალაგეთ ფართო ჭურჭელზე, ზემოდან დაადეთ დაფა და რაიმე მძიმე საგანი დააწოლეთ, რომ ზედმეტი სითხისგან დაიწრიტოს.ამასობაში სტაფილო, პრასი და ტკბილი წიწაკა დაჭერით ჩხირებად, ხახვი ალყა-ალყად, ნიორი წვრილად.მოშუშეთ ხახვი, დაამატეთ ქინძის თესლი, რამდენიმე წუთში დაამატეთ დანარჩენი ბოსტნეული და სუნელები. 2 წუთში გადმოდგით ცეცხლიდან, დაამატეთ დაჭრილი ქინძი და მწვანე ხახვი. კარგად აურიეთ, შეაზავეთ მარილით და პილპილით.მოამზადეთ მარინადი: ყოველ 1 ლ წყალს დაამატეთ 1 ს.კ შაქარი, 1 ს.კ მარილი, დაფნა, სურნელოვანი და შავი პილპილი გემოვნებით, ასევე ძმარი იმდენი რომ მარინადს სასიამოვნო მომჟავო არომატი გაუჩნდეს. წამოადუღეთ მარინადი.ბადრიჯანში თუ სითხე დარჩა ხელით გაწურეთ და ამოავსეთ ბოსტნეულის ნარევით. ჩაალაგეთ ღრმა ჭურჭელში და დაასხით იმდენი მდუღარე მარინადი რომ ბოსტნეული მთლიანად დაფაროს. დაადეთ რაიმე სიმძიმე, რომ ბადრიჯანმა არ იტივტივოს.1 კვირა დადგით თბილ ადგილას, შემდეგ გადაიტანეთ მაცივარში. თავზე მჭიდროდ დაახურეთ და შეეცადეთ მარინადი მთლიანად ფარავდეს.
