განსხვავებული და ძალიან ნოყიერი სალათა სტეიკით
განსხვავებული და ძალიან ნოყიერი სალათა სტეიკით
დრო 2წთ
ულუფა 2
სირთულე საშუალო
შეინახე რეცეპტი
რჩევა
სტეიკის მომზადებას თუ გადავწყვეტთ, ჯობს სუპერმარკეტში სპეციალურად სტეიკისთვის მომზადებული ნაჭრები ვიყიდოთ, ვინაიდან სასტეიკოდ ხორცი განსხვავებულ დამუშავებას გადის და უფრო მალე მზადდება, ვიდრე ჩვეულებრივი.

ინგრედიენტები

  • სასტეიკე ნაჭრები - 300-400გ
  • ზეითუნის ზეთი - 2 ს/კ
  • მარილი და პილპილი
  • ლიმონის წვენი - 2 ს/კ
  • როზმარინის პატარა ტოტი
  • სალათისთვის:
  • სალათა რომანო - ან ჩვეულებრივი სალათა
  • პამიდორი
  • ავოკადო - 1 თავი
  • მარილი და პილპილი
  • ზეითუნის ზეთი - 2 ს/კ
  • ლიმონის წვენი - 1 ს/კ
  • მდოგვი - 1 ჩ/კ
მომზადების წესები
მომზადების წესი:

შევურიოთ ერთმანეთს ზეთი, ლიმონის წვენი, პილპილი, როზმარინი და კარგად წავუსვათ ხორცის ნაჭერს და შევდოთ მაცივარში რამდენიმე საათი, შეიძლება ერთი ღამეც.

გავაცხელოთ ტაფა მშრალად. ხორცს მოვაყაროთ მარილი, ზეთი უკვე უსვია, მაგრამ შეგვიძლია კიდევ გადავუსვათ ორივე მხრიდან და დავდოთ გახურებულ ტაფაზე, საშუალოზე მაღალ ცეცხლზე. შევწვათ ორი წუთის განმავლობაში. შემდეგ გადმოვაბრუნოთ მეორე მხარეს, სიმხურვალეს ოდნავ დავუწიოთ, ისე რომ, საშუალო ტემპერატურა იყოს და არა დაბალი.

შევწვათ სტეიკი კიდევ 2-3 წუთი, გადაბრუნების გარეშე. შეწვის დროს ხორცი ხშირად არ უნდა გადავაბრუნოთ, თორემ წვენს გაუშვებს და ხრაშუნა ოქროსფერ კანს ძნელად გაიკეთებს. ამ დროის გასვლის შემდეგ, სწორ ტემპერატურაზე, სტეიკი აღწევს შეწვის საშუალო დონეს. თითის დაჭერისას ხორცი უნდა იყოს რბილი. რაც უფრო მეტად შევწვავთ, უფრო გამაგრდება.

ამის შემდეგ შეგვიძლია ხორცი 180 გრადუსზე შევდოთ ღუმელში 5 წუთით ან ტაფაშივე, დაბალ ცეცხლზე დავტოვოთ ორიოდე წუთი, მაგრამ ყურადღებით, რომ არ გამოშრეს.
გადმოვიღოთ სტეიკი და 15 წუთი შევასვენოთ, მაშინვე ნუ დავჭრით. ასეთ შემთხვევაში ხორცი წვნიანობას მეტად შეინარჩუნებს.

მანამდე მოვამზადოთ სალათა: რომანოს ფოთლები დავანაწევროთ და გადავიტანოთ თეფშზე. ზემოდან დავალაგოთ პომიდვრისა და ავოკადოს თხელი ნაჭრები. ზეთი, ლიმონის წვენი, მარილი, პილპილი და მდოგვი ერთმანეთს შევურიოთ და მოვასხათ სალათას. ზემოდან დავადოთ თხლად დაჭრილი სტეიკის ნაჭრები.

სალათას შეგვიძლია მივამატოთ სხვა ბოსტნეულიც, სურვილის შემთხვევაში.

ჟურნალი "გემრიელი"
ტეგები:
სალათა სტეიკი ნანახია: 3649