სააღდგომო კულიჩი - კულინარიის აკადემიის ლექტორის რეცეპტი
დრო 10წთ
ულუფა 3
სირთულე რთული
შეინახე რეცეპტი
რჩევა
სხვადასხვა წონის ცომს ყალიბში ამოსასვლელად და გამოსაცხობად სხვადასხვა დრო უნდა, ამიტომ
ეცადეთ ერთნაირები მოამზადოთ.
აჯობებს სამზადისი დღის 1-2 საათზე დაიწყოთ, ღამე უკვე ამოსული ხაში დაგხვდებათ, მოამზადებთ
ცომს და დაისვენებთ. დილისთვის ცომი აფუებული იქნება. გადაიტანთ ყალიბებში, დააცდით კიდევ
აფუებას და საღამოს გამოაცხობთ.

ბედნიერ აღდგომას გისურვებთ!

ინგრედიენტები

  • დაწნეხილი საფუარი - 60 გ ან მშრალი - 3,5 ჩ/კ
  • შაქარი - 750 გ
  • კვერცხი - 5 ცალი
  • მარილი - 0,5 ჩ/კ
  • კარაქი - 300 გ
  • რძე - 500 მლ
  • ფქვილი - 1400 გ (შეიძლება ცოტა მეტიც)
  • ქიშმიში - 250 გ (კონიაკში ჩამბალი)
  • დაჭრილი ნუში - 100 გ
  • ილი (კარდამონი)
  • მუსკატის კაკალი (ჯავზი)
  • 1 ლიმონის ცედრა
  • ვანილი
  • ზეთი - 50 მლ გადასაზელად
  • კვერცხის გული და რძე - ზემოდან გადასასმელად
მომზადების წესები
მომზადების წესი:

0,5 ჭიქა რძე შევათბოთ, მასში გავხსნათ საფუარი და 1 ს.კ. შაქარი. ტილო გადავაფაროთ და 10-15 წუთი დავდგათ. ეს მასა უნდა ამოვიდეს და შემდეგ ცოტა დაიწიოს, მაშინ არის საფუარი კარგად "გაღვიძებული".

კარაქი ორთქლის აბაზანაზე გავადნოთ. კვერცხი და შაქარი ასევე ორთქლის აბაზანაზე გავთქვიფოთ (გაითვალისწინეთ, ძალიან არ გააცხელოთ, ოდნავ თბილი უნდა იყოს), მალევე გადმოვდგათ და გავაგრძელოთ თქვეფა. კარგი გოგლიმოგლი უნდა გამოვიდეს.

ნახევარი წილი (დაახლოებით 600 გ) ფქვილი გავცრათ. დავუმატოთ მარილი. მორჩენილი რძე შევათბოთ.

გოგლიმოგლს დავუმატოთ კარაქი, რძე, საფუვრიანი მასა. დავაცრათ ფქვილი და მოვზილოთ ცომის ხაში. გადავაფაროთ ცელოფანი, შევფუთოთ თბილად და დავდგათ
ამოსასვლელად (საშუალოდ 6-8 საათი სჭირდება).

ამოსულ ხაშს ნელ-ნელა დავაცრათ დანარჩენი ფქვილი და დიდხანს ვზილოთ. ცომი თავიდან ხელებზე ეკრობა, მაგრამ მერე გამკვრივდება და ზელა გაადვილდება.

შეგვიძლია ორ ნაწილად გავყოთ ცომი და ისე მოვზილოთ. არ დაგავიწყდეს, შიგადაშიგ ხელები ზეთში დავისველოთ ხოლმე. ცომის კონსისტენცია ასეთია: გუნდა იკვრება, მაგრამ ხელებს მაინც ეწებება.

მოზელილი ცომი კარგად უნდა შეიფუთოს და თბილ ადგილას მოთავსდეს. მის აფუებას დაახლოებით 10 საათი სჭირდება.

კონიაკში ჩამბალი ქიშმიში გადავწუროთ, დავაყაროთ ფქვილი და მერე გავცრათ, რომ ზედმეტი ფქვილი მოშორდეს.

ქიშმიში, ნუში, ვანილი, ცედრა და სანელებლები შევაზილოთ ამოსულ ცომს, გადავიტანოთ ყალიბებში (1/3-მდე გავავსოთ) და კიდევ ერთხელ ვაცადოთ ამოსვლა.

ზედაპირს გამოცხობამდე გადავუსვათ ცოტაოდენ რძეში გათქვეფილი კვერცხის გული.
გამოვაცხოთ 180 გრადუსზე.

ამ მასალით გამოდის 3-4 მოზრდილი კულიჩი, რა თქმა უნდა, გააჩნია ყალიბის ზომას.

ჟურნალი "გემრიელი"
ტეგები:
ცომი ნუში პასკა ქიშმიში კულიჩი ნანახია: 34742