ლიმონს გადაავლეთ მდუღარე, გაამშრალეთ და გახეხეთ წვრილ სახეხზე ცედრა. ფქვილს შეურიეთ გამაფხვიერებელი, 50 გ შაქარი, მწიკვი მარილი და ლიმონის ცედრა. შემდეგ დაუმატეთ 5 ს/კ რძე, ზეთი და ხაჭო.ათქვიფეთ მიქსერით გლუვი, ერთგვაროვანი მასის მიღებამდე. გადაიტანეთ ცომი ფქვილმოყრილ სამუშაო ზედაპირზე და გააბრტყელეთ წრის ფორმაზე. წაუსვით ფორმას ზეთი, მოაყარეთ ფქვილი და გადაიტანეთ ცომი მასში, გაუკეთეთ 2 სმ სიმაღლის კიდეები. ჟოლოს მოაყარეთ სახამებელი, აურიეთ და გადაიტანეთ ფორმაში. ცალკე ჯამში ათქვიფეთ არაჟანი, შაქარი, კვერცხი და რძე. მიღებული მასა მოასხით ჟოლოს. აცხვეთ 180 გრადუსზე გახურებულ ღუმელში 25-30 წუთის განმავლობაში. მზა ნამცხვარი გააცივეთ და მოაყარეთ შაქრის პუდრა. გემრიელად მიირთვით!