1. რეცეპტის მთავარი საიდუმლო - გრილზე შემწვარი ბულგარული წიწაკაა, რომელიც განსაკუთრებულ გემოს ანიჭებს კერძს. გარეცხილი წიწაკა დააწყვეთ ქაღალდ დაფენილ საცხობ ლანგარზე და გამოაცხვეთ 30-35 წუთის განმავლობაში, 200 გრადუსზე, გრილის რეჟიმით, სანამ კანი ალაგ-ალაგ არ გაუშავდება. გამომცხვარი ბულგარული მოათავსეთ თავდახურულ ჯამში. ცოტა ხნის შემდეგ მოაცალეთ კანი, მოაშორეთ ყუნწები და თესლი, ხოლო რბილობი დაჭერით პატარა კუბიკებად. სანამ ბულგარულები ცხვება: 2. ჩაასხით ფიალაში ზეითუნის ზეთი, ჩაჭყლიტეთ მასში ნიორი, დაუმატეთ პროვანსის ბალახები, მარილი და პილპილი. კარგად მოურიეთ, გაუსინჯეთ გემო, რომ მარილი იგრძნობოდეს. 3. დამდუღრეთ რბილი პომიდორი, გააცალეთ კანი, დაჭერით წვრილ კუბიკებად ან დახეხეთ მსხვილ სახეხზე. 4. წვრილად დაჭრილი ხახვი მოათავსეთ ზეთიან ტაფაზე, და დაიწყეთ მოშუშვა საშუალო სიმხურვალეზე. ცოტა ხანში მოაყარეთ თანაბრად დაახლოებით ერთი არასავსე ჩაის კოვზი შაქარი და გააგრძელეთ კარამელიზაცია, ხახვმა უნდა მიიღოს თანაბარი ოქროს ფერი. 5. გაოქროსფერებულ ხახვს დაასხით პომიდორი, დაუმატეთ დაფნის ფოთოლი, ბაზილიკი (არაა აუცილებელი, თუმცა ძალიან სასურველია) და გააგრძელეთ მოშუშვა ტაფაზე 7-10 წუთის განმავლობაში, სანამ პომიდორი ოდნავ არ შესქელდება. 6. ბოლოს დაამატეთ დაჭრილი ბულგარული წიწაკა, მარილი და დაღერღილი წიწაკა გემოვნებით. მოურიეთ კარგად, და დატოვეთ დაბალ ცეცხლზე კიდევ 5-10 წუთი, მიეცით საშუალება სოუსს კარგად, ფაფასავით გასქელდეს - წყალ-წყალა სოუსი არ გინდათ, თორემ თქვენი რატატუი ზედმეტად წყლიანი გამოვა. მუდმივად მოურიეთ, რომ არ მიიწვას. გასინჯეთ მარილი და წიწაკა, მნიშვნელოვანია, რომ მარილი ჰქონდეს ზომაზე და არ დააკლდეს. 7. გამზადებული სოუსიდან ამოიღეთ დაფნის და ბაზილიკის ფოთლები; სოუსი თანაბრად გადაანაწილეთ იმ ფორმის ძირზე, რომელშიც ამზადებთ რატატუის. სოუსი იმდენად სქელი უნდა იყოს, რომ კოვზით დაჭირდეს მიხმარება გადანაწილებისას - ეს მნიშვნელოვანია, რომ თქვენი რატატუი შემდგომ წყალში არ ცურავდეს. 8. დაჭერით თხელ თანაბარ რგოლებად ბოსტნეული - 1 მსხვილი ბადრიჯანი (ან 2 საშუალო), 3 ცალი საშუალო ზომის მკვრივი პომიდორი, 1 დიდი (ან 2 საშუალო) მწვანე ცუკინი, 1 დიდი (ან 2 საშუალო) ყვითელი ცუკინი. ეცადეთ შეარჩიოთ მეტ-ნაკლებად ერთნაირი დიამეტრის ბოსტნეული, რომ დაჭრის შემდეგ მეტ-ნაკლებად ერთნაირი ზომის რგოლები მიიღოთ. რაც უფრო თხელი რგოლები გექნებათ - მით უფრო გემრიელი და ლამაზი გამოვა რატატუი. საუკეთესოა 2 მმ სისქის. ეცადეთ დაჭრისას მეტ-ნაკლებად ერთნაირი დიამეტრის რგოლები გამოიყვანოთ (მაგალითად, თუ ბადრიჯანი შედარებით უფრო ვიწროა, დაჭრით ოდნავ დიაგონალზე, ამით გაზრდით რგოლების დიამეტრს). 9. დააწყვეთ ბოსტნეულის რგოლები სოუსზე. ფერების რიგითობა არსებითი არაა, მთავარია, ერთი ფერისა არ მოახვედროთ ერთად. მთლად ვერტიკალურად ნუ დააყენებთ, ეცადეთ ოდნავ წააწვინოთ. გირჩევთ, რომ პომიდვრის რგოლები შედარებით იშვიათად, ყოველ 10-12 რგოლში ერთხელ ჩაატანოთ. პომიდორი არის სოუსშიც, ასე რომ დამატებით ბევრი აღარ გინდათ, რომ პომიდვრისკენ არ წაიღოს გემო. 10. დაწყობილ ბოსტნეულს თანაბრად მოასხით სურნელოვანი ზეთი და ფუნჯით გადაანაწილეთ მთელს ზედაპირზე. სულ ბოლოს დააწყვეთ ზემოდან რამდენიმე ტოტი ბეგქონდარა. 11. გადააკარით ფორმას ალუმინის ფოლგა და შედგით ღუმელში: ჯერ 180 გრადუსზე, რეჟიმი „ზედა+ქვედა“ 20 წუთით, შემდეგ აწიეთ ტემპერატურა 200 გრადუსზე და გააჩერეთ რატატუი კიდევ ერთი საათი; შემდეგ მოხსენით ფოლგა, დატოვეთ 15 წუთით იგივე რეჟიმზე; ხოლო ბოლოს ჩართეთ გრილის რეჟიმი და აუწიეთ ტემპერატურას 220 გრადუსამდე. ადევნეთ თვალყური, ყველა ღუმელი განსხვავებულია, მაგრამ მაქსიმუმ 15 წუთში თქვენი რატატუი საბოლოოდ და ლამაზად მოიბრაწება ზემოდან, შეგიძლიათ გამოიღოთ, ოდნავ გააგრილოთ და მიირთვათ გემრიელად.
