გასუფთავებული ინდაური ჩავდოთ წყლით სავსე ქვაბში, დავუმატოთ ძაფით შეკრული ქინძი, მთლიანი მიხაკები, შავი პილპილის მარცვლები, 1 თავი გაფცქვნილი ხახვი და მოვხარშოთ, შემდეგ დავდოთ თუნუქის ფურცელზე და ღუმელში შევბრაწოთ. თუ მაღაზიის ქათამს გამოვიყენებთ, ნახევრად მოვხარშოთ. ფრინველი დავჭრათ საშუალო ზომის ნაჭრებად. წვრილად დაჭრილი ხახვი მოვშუშოთ ბულიონის მონახად ცხიმში. ნიგოზი, ხახვი და ნიორი გავატაროთ ხორცსაკეპ მანქანაში, ავურიოთ სანელებლები და გამოვხადოთ ზეთი. მოშუშული ხახვი, კვერცხის გულები ავზილოთ და გავატაროთ საცერზე ან 2 ჭიქა ბულიონის დამატებით ბლენდერში ავთქვიფოთ. დავუმატოთ იმდენი ბულიონი, რომ არაჟნის სისქე გახდეს. ქვაბში ჩავაწყოთ ინდაურის ნაჭრები, მოვასხათ ნიგვზიანი მასა, დავდგათ ცეცხლზე და მუდმივი მორევით ადუღებამდე მივიყვანოთ. როცა ბუშტუკები გაჩნდება, გადმოვდგათ ცეცხლიდან. შეგრილებულ კერძს დავუმატოთ ლიმონის წვენი.
