ცომის მომზადება: გაცრილ ფქვილში გავაკეთებ პატარა ორმოს. ორმოში დავამატებ საფუარსა და მარილს. დავასხამ ცოტაოდენ თბილ წყალს და ჩანგლით ავურევ, რომ საფუარი და მარილი გაიხსნას და ცოტაოდენ ფქვილსაც შევურევ. გადავაფარებ ჭურჭელს ტილოს და დავტოვებ დაახლოებით 10 წუთით, რათა საფუარი გააქტიურდეს. როცა საფუარი ამუშავდება, დავამატებ დარჩენილ თბილ წყალს და მოვზელ ცომს. ცომის მოზელის ბოლოს დავამატებ გამდნარ ცხიმს და კვლავ გადავზილავ, რომ ერთგვაროვანი მასა მივიღო. როცა ცომი ამოვა, კიდევ ერთხელ გადავზილავ, ამოვაგუნდავებ და გამოვაცხობ ლობიანს და ხაჭაპურს. ლობიანის გულსართი: მოხარშულ ლობიოს დავამატე ოქროსფრად მოთუშული ხახვი და ბეკონი, წვრილად დაჭრილი მწარე წიწაკა, ქონდარი, შავი პილპილი და მარილი. ყველაფერი ერთად კარგად ავურიე.
