myquiz

„არის დეტალები, რომლებიც გამოცდილებით მოდის და არ წერია რეცეპტში“ - ნახეთ საუკეთესო პასკის ყველა საიდუმლო - Gemrielia.ge

„არის დეტალები, რომლებიც გამოცდილებით მოდის და არ წერია რეცეპტში“ - ნახეთ საუკეთესო პასკის ყველა საიდუმლო

ერთ-ერთ კულინარიულ ჯგუფში წავაწყდით არაჩვეულებრივ რჩევებს პასკასთან დაკავშირებით. ეს ყველაფერი ცალ-ცალკე სტატიებში ბევრჯერ გაჟღერებულა, მაგრამ ერთიანად თავმოყრილს პირველად გთავაზობთ.

„ყოველ წელს ყველას გვაქვს სურვილი ლამაზი და გემრიელი პასკა გამოვაცხვოთ, ამიტომ ვეძებთ ათას რეცეპტებში საუკეთესოს. მე კი ვფიქრობ, საუკეთესო ისაა, რომელსაც ხელს შეაჩვევ და დროსთან ერთად თავად დახვეწ.

ქალბატონი თამრიკო კიკაბიძის რეცეპტი ლამის ყველა ოჯახმა იცის, ძალიან გემრიელად მოვირგე მეც. რეცეპტს წელსაც უცვლელად შემოგთავაზებთ, ოღონდ უფრო გავშიფრავ რათა ის ეფექტი მივაახლოვოთ, რაც წლების წინ იმ რეცეპტმა დადო.

არის დეტალები, რომლებიც გამოცდილებით მოდის და არ წერია რეცეპტში, მაგალითად: „ძალინ ბევრი ქიშმიში ჩავაზილე და რომ გავჭერი არ ჩანს“, „ძირი მიმეწვა, არადა ზუსტად იმ ტემპერატურაზე ვაცხვე, რაც რეცეპტში ეწერა“, საფუარის რაოდენობის გადამეტება, სუნელების და ჩირეულის შეზელა, რომელი ჯობია რძეზე მოზელილი თუ მაწონზე ან არაჟანზე, პასკა გაჭრისას იფშვნება? უამრავი კითხვაა და ამ კითხვებზე პასუხი წერია რეცეპტებში? არ იქნება ჩემგან სწორი ავტორის რეცეპტში ცვლილება შევიტანო, ეს არაეთიკური და არაჩემეული საქციელია, უბრალოდ გეტყვით, რომ ჩემი მოკრძალებული გამოცდილებით:

  1. საფუარი თუკი ახალი ანუ ვადიანია და არის სანდო ბრენდის 3 კილო ფქვილზე 4 სკ ბევრია, საფუარის გემომ არ უნდა გადაფაროს ტკბილი სურნელოვანი ცომის გემო. ხაშის დაყენების დროს საფუარი თუკი გამრავლდა ე. ი. იქ ბაქტერია უკვე არი და უბრალოდ მოთმინებაა საჭირო რომ მძიმე ცომმა ტანი აწიოს. არ დააჩქარებინოთ საფუარის ხარჯზე ცომს ამოსვლა.
  2. პასკის ცომის ზელა იწყება ღამე მშვიდ და სუფთა გარემოში, ცომი იზილება 3 ეტაპად:
  • ხაშის დაყენება10 წუთით;
  • ცხიმის გალღობა;
  • კვერცხის ცილა/გულის ცალ-ცალკე ამოყვანა

და ბოლოს ამ სამის გაერთიანებით და დიდხანს ზელით უნდა მიიღოთ შემდგარი ელასტიური ცომი.

paska3-1650352959.jpg

ახლა, რაც შეეხება, რატომაა სუნელების და ტკბილი ჩირეულის შეზელა საჭირო ცომის ამოსვლის შემდეგ? მე ორივე ვარიანტი გამოვცადე შარშან, პირდაპირ შევაზილე სუნელიც და ჩირეულიც და არაჩვეულებრივად ამოსული დამხვდა ცომი დილას. წელს ზუსტად ისე გავაკეთე, როგორც რეცეპტში და ესეც გადასარევად ამოფუვდა, როგორ ფიქრობთ არ ჯობია ცომმა მთელი ღამე მიიღოს გემო სუნელებისაგან და ქიშმიშიც ცომშიც შეიზარდოს და არ ცვიოდეს აქეთ იქეთ?

ბარემ აქვე გავცემ კითხვას პასუხს: რატომ ქრება უხვად ჩადებული ქიშმიში ცომში? - იმიტომ რომ ცომი ცოცხალი ორგანიზმია, ბაქტერიების წყალობით იწყებს ამოსვლას და ქიშმიში კი დაბლა-დაბლა მოდის ცხიმთან ერთად, ამიტომაა საჭირო ცუკატის შერევა. ცუკატი ცომს დაყვება და ჭრილი ლამაზი გამოგივათ, ბაზარში ნაყიდი აუცილებლად გარეცხეთ გააშრეთ და შაქრის პუდრში ამოაგუნდავეთ, ისე მოიხმარეთ, შეგიძლიათ ის ანანასის ტკბილ წვენშიც გააჩეროთ კარგი არომატისთვის და შემდეგ გააშროთ.

ლოგიკურად ცხიმზეც მინდა თქვენი ყურადღება გავამახვილო: კარაქი უნდა იყიდოთ 82,5% და მეტი პროცენტულობით. არ შეცდეთ, 82% აწერია ბევრს, მაგრამ ეგეც არაა სუფთა კარაქი.

ამ რეცეპტში ცომი სულ ერთხელ უნდა ჩაიზილოს დილით ამოსულზე სუნელ-სანელებლების შეზელისას, შემდეგ დამუშავებული ცომი გადადის ფორმებში და იქ კიდევ 6 საათი ამოდის, ამ დროის განმავლობაში ცხიმი და ქიშმიში კონსოლიდირდება, მეტი წილი დაბლა ორი თითის სიმაღლეზე, სწორედ ეს გახლავთ მიზეზი შემდეგ პასკებს რომ ძირი ეწვებათ, ცხიმი იწვის, მიუხედავად რეჟიმის და ტემპერატურის დაჭერისა და გვიწევს ჟონგლიორობა გრადუსების ან არადა მაღლა-დაბლა წვის კონტროლი.

კიდევ ერთი, თავი რომ არ დაუსკდეს პასკას, თითო გუნდას სანამ უშუალოდ ფორმაში ჩადებთ გადაზილეთ, ზილეთ დაუნანებლად ცომი გაშალეთ და შემდეგ შეკარით ისე რომ ე. წ.მოკუჭვის ადგილი მოხვდეს დაბლა და მაღლა უბზარო ჩადეთ. მე ქიშმიშსაც კი ცომის შიგნიდან ვაქცევ, რომ ბზარი არ გააკეთებინოს ცომს.

პასკის რეცეპტი

  • 10 კვერცხი
  • 1.200 შაქარი
  • 3 კგ ფქვილი
  • 4 სუფრის კოვზი მშრალი საფუარი ან 120 გრ დაპრესილი საფუარი
  • 1 ლიტრა რძე
  • 250 გრამი მარგარინი
  • 250 გრამი კარაქი
  • 1 ჭიქა ზეთი
  • 300 გრამი მუქი ფერის ქიშმიში
  • 1/2 ჩკ დარიჩინი, დაფქული
  • 1/2 ჩკ ილი ანუ კარდამონი, დაფქული
  • 1/2 ჩკ მუსკატის კაკალი, ანუ ჯავზი, დაფქული
  • 1/2ც.კ მიხაკი-დაფქვილი-თუ რომელიმე სუნელი არ გიყვართ ნუ გაუკეთებთ ან ცოტა გაუკეთეთ
  • ცუკატები სურვილის მიხედვით

paska2-1650352877.jpg

მომზადება:

ნახევარ ლიტრა თბილ რძეში გახსენით საფუარი 4 სუფრის კოვზი, 1 ჩაის კოვზი შაქარი, რამდენიმე კოვზი ფქვილი დაუმატეთ, რომ კარგად აფუვდეს, ხაშის მასა უნდა იყოს არაჟანის კონსისტენციის, გადავდოთ ასაფუებლად. მეორე ნახევარ ლიტრა თბილ რძეში გახსენით ცხიმი-მარგარინი, კარაქი, ნახევარი ჭიქა ზეთი. ცალკე 10 კვერცხის ცილა კარგად ამოიყვანეთ (ოთახის ტემპერატურის კვერცხის ცილა უფრო კარგად ამოდის), დაუმატეთ 10 სუფრის კოვზი შაქარი, 1 ჩაის კოვზი მარილი და კარგად აურიეთ.

ცალკე 10 კვერცხის გულისგან და დარჩენილი შაქრისგან ვაკეთებთ გოგლიმოგლს, კარგად ათქვიფეთ გათეთრებამდე. გოგლიმოგლს დაუმატეთ გამზადებული ბეზე და კარგად აურიეთ. ცალკე დიდ თასზე დავყრით 3 კგ ფქვილს დავასხამთ საფუარიან და ცხიმიან რძეს, კარგად აურიეთ და შეაზილეთ კვერცხიანი მასა, კარგად აურიეთ, დაუმატეთ დარჩენილი ნახევარი ჭიქა ზეთი და კარგად მოზილეთ ცომი.

ცომს ამოსასვლელად სჭირდება 6 საათი. ღამით მოზილეთ შეფუთეთ თბილად და დილით უკვე მზად არის, ღამე ჩაზილვა არ ჭირდება. დილით ამოსული ცომი ჩაზილეთ კარგად, დაუმატეთ ქიშმიში, თქვენი სურვილის მიხედვით, თუ გნებავთ, ცუკატები, 1 ცალი ლიმონის ცედრა, ვანილი, ნახევარ-ნახევარი ჩაის კოვზი მუსკატის კაკალი, ილი, დარიჩინი და მიხაკი. ვისაც არ გიყვართ დარიჩინის გემო, არ დაუმატოთ.

აიღეთ ფორმები, ჩაუფინეთ ქაღალდი, წაუსვით ცხიმი. ცომს ფორმაში ვდებთ ნახევრამდე. ცხობისას 2-ჯერ იზრდება. ფორმაში ცომს ვაჩერებთ 6 საათი. შემდეგ შედგით გახურებულ ღუმელში 150 გრადუსზე.1 საათის შემდეგ გამოაღეთ ღუმელი და ხის ჩხირით გასინჯეთ. როცა გამოცხვება, შეგრილდეს და შემდეგ ამოიღეთ ფორმიდან. თქვენი სურვილით შეგიძლიათ მორთოთ, 2 პორციას ერთად ნუ მოამზადებთ. ყველაზე მთავარია, ცომის მოზელის დროს უნდა იყოთ კარგ განწყობაზე და მთელი სიყვარულით მოზილოთ ცომი, უნდა მოეფეროთ ცომს.

წარმატებებს გისურვებთ!

ამ რეცეპტით პასკა გამოდის მძიმე და ნოტიო, როგორიც უნდა იყოს ნამდვილი პასკა, არაფუმფულა.

ბოლოს მადლობა უფალს, რომ შემაძლებინა ჩემი ოჯახის გახარება, უფალმა გაგახაროთ თქვენც!“

კომენტარებში დაგვიწერეთ, როგორ მოგეწონათ ეს რჩევები და თქვენ თუ დაამატებდით რამეს.